mizo gothic story - 15th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

                    Kan han tum chawp deuh chuk chuk kha ania, chhungte chu an lawm vak lo kher mai. Kan haw min lo ngaih ve tehreng nen, ramhuai ringawt kan buaipui si. Kan chhungte hnai tak tak theuh bak kan hrilh lova, ka nu phei chuan he thil thleng teh hrep vang hian Aizawl lama hnathawk turin min ngen nasa hle mai. A kar leh lawkah chuan kan chhuk leh ta a, zan lama thleng kan ni nain Pi Biaki pawh chu a chau vak lovin ka hria. Pi Biaki hi Esther inah a thleng a, kei chu neuh neuh ka inlam hnu chuan ka thianpa in lamah ka phei a. A tuk tuk lehah chuan ka inlamah kan phei ta dial ani. Pi Biaki chuan May thlalak (ka tar chhuah kha) chu a ngaipawimawh zual tlat hian a hriat a.

                    Engmah em em pawh chu kan sawi zui lem lo nain, zan lamah chuan Mizoram lam atanga kan ken thlak eitur chu kan hmeh a. Zanriah te kan han ei zova, mut a la chhuak lo bawk nen, TV en pah chuan kan han ti ti a. Esther lah chu Facebook lamah a lo online ve pah bawk a, nun chu a pangngai viau rih ani. A hahdamthlak hle mai rilru pik lutuk zualpui pawh a reh ti tih deuh mai. Chutia kan han ti ti chu thuthleng dupah chuan ka tluzal pah mai mai pah a, mahse ka dar dinglam hi a rawn sa zawk mai a. Mahse a nat dan kha dar herh ang chi deuhvin a awm, a hnuah a na telah telah ta mai a. Ka han thu chhuak chu ka t-shirt atang chuan Tit (centipede)hi a rawn tla nawlh mai a. Ka raphlum nghal chiang hle.

                    A te viau nain a tur fan chu a na hle tho mai (tun thlengin dar na ka neih phah ta in ka hria). Han tih vak ngaihna chu kan hre hlawm lova mahse Pi Biaki chuan chinai hi a rawn tat teuh mai a. Chutah chiah chuan ani, ka room lam atang chuan nui ri kan hriat ni, a rapthlak duh kher mai. Pi Biaki erawh chuan mak ti hmel pawh a pu lo, May thlalak chu a en reng ringawt mai a. "Khi le a intan ta e", a rawn ti phawng mai a Pi Biaki chuan thlalak kawh pahin. Kan han en ve chuan Tit hi an rawn chhuak sup sup mai a frame atang chuan, mak ve deuh chu ani. An seh kan hlau khan kan rilru pawh a luah zawk mah. theih ang angin kan han that a mahse vawilehkhatah an bo leh duak mai.

                   May chu thlalak ah chuan a rawn nui ver ver a, Pi Biaki chuan dam deuh hian, "A tawp thlengin kan tang dawn a, i ngam ve em?", tiin May thlalak chu a han zawt a. Chutah Esther chuan Mary number atang chuan call a dawng tlat mai. A han pick up chuan tawng ri ni si lo, thawhah deuh thawri chauh anga hriat si hian, "Ka rawn thleng ta", hi a rawn ti a. Kan hlau hlawm viau nain Pi Biaki tak chu engtinmah pawh a awm ve lo ang hian a lang, mak ka ti vak hran tawh lo. Chutah le, Mary chu tukverh bar inkar zim lutuk maiah chuan a rawn inhnawh lut anih chu. Ka te chhuak tep ani khatih lai khan. Min rawn melh reng lehnghala, a inhnawhluh pah chuan... to be contd

mizo gothic story - 14th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

                    Chet lak dan tur chu keini tan chuan hriatthiam har tak ani. Pi Biaki chuan kan tih tur hmasa ber chu anmahni pahnih biak pawh ani tiin min hrilh a. Ka rilru a lo lang mai mai pakhat chu- Mary hi chu kan be pawp thei maiin ka ring a, mahse May ber hi engtia tih chi nge ni ang tih ani. Tih tur min hril mahse han pen hmasak dan tur kha a vang hle mai, a tukah chuan May pa va hmuh hmasak phawt chu kan rilruk ta a. A pa chu office lovin inah a lo awm a, inthlahrun chu a na duh kher mai. May nen kan inkawp thin avangin kei chu min hre sa a, mahse rilru chu a thar duh khawp mai. Thil awmdan zawng zawng chu Esther chuan hmaih awm miah lo hian a hrilh ta a, a pa chu a sen tawn tawn mai a, a rilru a thar tih chu hai rual ani lo.Mahse ani pawh hian Mary nu sawi ang deuh tho khan a sawi ve tho mai. Khawvel hran chungchang kha phone a an biak hnuhnun bera a sawi ani ve tho mai.

                    Hma chu kan sawn lem lo May pa kan va hmu hi, mahse Pi Biakin mi thuhmun a tih vel ber kha mak a ti. Ani chuan, "May pawh khan Mary hming kha a lam ve tho asin, khami hnu lawk khan (mittui parawl deuh hlek leh chhuat melh reng chung chuan) a inawkhlum kha ania. Nang chuan a ruang pawh kha i hmu hman ta lo anih kha. Ka fanu neihchhun ani nain, a ruang awmdan kha chuan min rap ve khawp mai. A chhan chu a hmel awmdan kha a tihbaiawm em a tin ni, khami vang kha ania a tirah pawh mi thah a anih kan rin chhan. A taksaah khan hliam a awm nual bawk si nen, mahse kan chhui tir ta lem lova. A in kha a chhunglamah a inkalh tlat bawk sia, bakah kutthlakna hnuhma a awm lo a tin ni", ati a. Thudang han vuak chu har tak ani, reiloteah chuan kan chhuak ta a. Chanchin inhrilh zel te pawh kan intiam ani.

                    Pi Biaki chu kan va phone a, May pa sawi vel pawh kan han hrilh a. Ani hi chuan Mary chu call turin minti ani, he thil hi Esther kutah kan han dah ngawt a. Ani lah chuan a lo hreh tawh nasa mai si, chuvang chuan ka kutah kan dah ta zawk a. Ka hreh viau nain chumi zan chuan Mary chu ka han phone ta a (call hi ka record vek a kan inbiakna hi). A lo pick up vat a, a sawi chhun chu, "khawnge in awm zawh vek a? Ka khua a har lutuk ania, lo kal rawh u", tih bak sawi lo. Biak nawn leh ka han tum thin nain a tlang thei tawh der lo. Hetih lai hian Esther chuan Mary call a lo dawng ve chiah bawk a (a darkar leh minute thlengin a hun a lo in ang chiah lehnghal, mak ve tak chu ani). Esther ve thung chuan, ahmaa thaw ri ka lo hriat ang kha a lo hre ve a, a hlau chuan min rawn hrilh vat a.

                    A tukah chuan Pi Biaki inah inhmuhkhawm kan ti a, ka va thlen chuan an lo awm thap tawh nghe nghe. Pi Biaki chuan ro a han rel a, kan awmna hmunah chuan let a anmahni biak pawh tum chu fuh berin a hria ani. Kan tum sak theih chuan ani pawh hi lokal a duh ani. Tichuan kan hnathawhna lamah chuan let turin kan han inpuahchah a, chhungte bulah nuam tak pawhin kan awmrei hman lo hle mai. Mahse he thil hi a pawimawh si a, thil dang kan ti hman lo ani ber. Kan sawifiah zuai ang a Pi Biaki hian kan hnathawhna hmuna kal a rawt chhan hi- Mary kha Pi Biaki a lo khawih hnu khan a inlan leh tawh loh bakah, ka inah bak khan May a inlan a rin loh vang ani.... Mahse Mary kha engtin nge kan khawvelah mihring pangngai angin a lo awm theih? May pawh chuti bawk.... to be contd

mizo gothic story - the 13th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

                    Pi Biaki chuan a ina phei nghal tur chuan min rawn ti a. Kan va thleng chiah, a ina kan luh hma si chuan te ri ka hre thut mai a. Kan tlan lut nghal chu, Pi Biaki chu a lo tlu reng mai a. Kan han kai thova, tui te kan han pek hnu chuan a tha zawm leh chu ani mai a. Ani chuan, "Mary kha a rawn kal a, min rawn sawisa a... a bak ka hre zui lo ani", a ti a. Kan han thut that tir a, ani chuan, "Tuna thil awm dan hi ka la hre chiang bik lova. Mahse Mary leh May hi thuhmun an nih ka ring tlat mai, mahse an awmna khawvel hi chu a in ang lovin ka hria. May leh Mary te hi mihring chu an ni tho, thi ve ve tawh mahse. Ka sawi awmzia chu thlarau leh minung inkar ami anni. Kan khawvel bakah hian Thim lalna khawvel hran hi Thim lalpa hian a siam sask a tih theih ang chu", a ti a.

                    Kan bo map map hle ani Pi Biaki thil sawi chungchangah hian. Ani pawh hian a sawithiam bik lo ni berin ka hria. A han sawi chhunzawm ta zel a, "Ka rin dan bak engmah sawi theih ka nei bik lova, mahse ka hriat chu an khawvel hi thlunzawm a an tum ani. Mipakhat anga awm a, chu khawvelah chuan hruai luh che u an tum niin ka hre ber....". Ka lo pawt chat a a thusawi lai chu, "Anih leh nachin khan engtin nge lo khawihtu che kha Mary ani tih i hriat theih, a hming a sawi em ni? Chuan anih leh engatinge keini kher?" ka lo ti hmanhmawh pek a. Ani chuan, Mary kha chu (ka thianpa melh hrek chung chuan) an (ka thianpa) venga ka awm lai khan min rawn tihthaih tawh alawm....

                    "Nangmahni chungchangah erawh chuan sawi theih ka la nei rih lo. Mahse an thil tum anga ka rin hi chu an thlen tir theih phawt chuan he khawvel atang hian in bo hmak ani mai. Chuti anih chuan an thil tum dang thei turin in chet a ngai dawn a, ka theihtawpin ka tanpui ang che u. Mahse nu harsa ve tak ka ni a, hlawh chu ka phut ve ang e", a ti a. Esther chuan hlawh chu a phut zat zat pek kan hreh loh thu chu a lo sawi ve bawk a. Keini mihring pangngai tan chuan hriatthiam chu har tak ani. Kan bo tlang hle, May te khawvelah pawh chuan bo te ka hlau tulh2 mai a. Engtia chet lak tur nge chu Pi Biaki chu kan han rawn zel a... to be contd

mizo gothic story - 12th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it) 

        No power. Back up awm lo. Huizzzzzzzzzz zaninah hman loh chuan naktuk lamah ani tawh mai poooot ho ve tak ani ho ve tak.... saaaaaaaaaaaala chuta karah, vawiinah ka phone atangin facebook ka luh vangin account settings te pawh tih that a ngaih phah vek, back up tlemte awm chhun hmangin ka rawn in explain e,

            NEXT CHAPTER-AH CHHUNZAWMNA

mizo gothic story - 11th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

                    Aizawl a veng pakhatah chuan kan inkhalh phei ta a, a mak bawk si, a rap awm bawk si tih bak hian a hril zo mawlh lo.Ka thianpa pawh chu mak tih riauna ka nei tlat mai, a chhan pawh thil hriat chu a nei ani, ni lo se he nu inah hian min hruai ka ring lo. Kei lahin engmah ka hre der si lo, enge Mary'n khawvel hran a tih te kha ka bo tul tulh tawh mai a. A enga pawh chu nise, kan kal tumna chu kan han thleng hlawl a. Kan mi hmuh ber chu nu upa lam hret (kum 60 vel niawm tak) hi a lo nia, a inchhung chu a thim kher mai. A uap bakah a rim kha a na hle (rim na = damdawi rim ang cai hi), balh chu a bal miah lo thung tlat lawi si. Ui hi pali lai a lo vulh nghe nghe a, mahse a fel phian mai min lo bauh ka rin tehreng nen.

                    Ka thianpa chuan a hmaa thil thlengte chu a han hrilh zung zung a, kan mi hmuh nu hi Pi Biaki ani nghe nghe. Ani chuan a lo ngaithla kar mai a, tawng lo chuan zaizirin a lo bu nghauh nghauh thin a. A hnuah Pi Biaki chuan, "He thil hi keimahin chinfelsak che u ka tum ang a, nangmahni in awm ve pawh a tul anih chuan ka rawn ko ang che u. Zanin atangin he thil hi ka buaipui ang, mahse ka rawn koh hma che u chuan mi tihbuai a tha lovang", tiin kan inthlah liam chu ani der mai.Ka thianpa ka zawh lahin ani chuan, "Ramhuai lam buaipui thin ania, amah tak hi chu ka vawikhat biakna ani e. A thiltih vang hian kan veng atangin hman kum khan an hnawtchhuak tawh a, min pui theih ka ring deuh mawle", ati mai a.

                    May te in lam pan chuan kan tlanphei leh ta a. Kan lo be lawk mang lem si lova, tumah an awm lo hi a alo ni a. An landline number bak ka neih loh avangin an thenawmte ka han dil a mobile number. Anni chuan number pakhat min pe a, May pa number anih thu pawh a sawi lang zauh nghe nghe ani. Ka han be pawp a, office ah a lo awm avang leh meeting an lo neih avang chuan a tukah a remchan chuan kan hmuh duh thu chu ka hrilh a. Thilmak a thleng leh ta- Esther chuan call a dawng tlat mai. Mary number ngei a lo ni a, a han lak chuan Mary chuan, "Khawnge in awm zawh vek a?", a rawn ti a. A thi tawh tih kan hriatchian anih avangin a mi khawihdan chu dang tak ani. Esther chuan biak pangngaiin a bia a, mahse network vang nge a tawp ta tlat a. Chutih lai tak chuan ka thianpa pawh chuan Pi Biaki hnen atang chuan call a lo dawng ve bawk a....to be contd

mizo gothic story - the 10th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

                    Kan han rel khawm nak nak a, Mary chanchin hre turin Mizoram lam pan kan rilruk ta a. A nu kan han biak pawp leh chuan an address te kan han dil a, chawlh la in kar khat cham tum kan ni. Khua a that vak loh avangin kan flight pawh chu an delay nasa ngiang mai. Tluang takin Lengpui kan thleng a, chhungte pawh hrilh lawk lem lo kan nih avangin, taxi kan la chho ta kha ania. Sawi chipchiar lo mai ila, kan thlen tuk chuan kan han inhmukhawm a, Mary te in lam chu kan pan ta a. Mary (a hming hi ka lam rik deuh sek a ngai dawn a, min lo hrethiam mai aniang chu) nu hi kan hrilhlawk chu an mai a, kan va thlen chuan a lo fel hle mai, thingpuite min lo lum sak nghal a. Thil thleng te kan han hrilh chuan mak ati hle mai a.

                    A fanu (Mary hian a pa hi a naupan tet laia chan ani) chutianga phaia hnathawk a awm, a inluahpuinu ngei mai leh, a thiante a hmu hnunung ber tu te meuhvin Mizoram lam pan a kan han hmu chu mak a ti hle mai a. Dik tak chuan kum tam fe a liam tawh a Mary boral hnu hian, mahse a nu kan han hmu ngawt mai pawh a. Kan hlawhchham lem love, Mary thih dan khan han zawh chuan heti hian min chhang a, "Mary kha rilru buaina a neih ka hre ngai lova, amaherawhchu 'Khawvel hran inhriatthiam loh tur si ami ka nih hi" a ti thin a. Eng teh ualah ka ngaihsak ngai lova, a sawi zin tak viau hnu chuan rilru lam doctor ka panpui ta a. Doctor lah chuan engkim a tha vek e a ti si a, keini ang nu mawl tan chuan a hre zawk thu chu a lo pawm loh theih lohva.

                    "Mary kha ka zawt fova, eng khawvel nge tih. A ni chuan, 'He khawvel ang tho hi ani e, a danglam na chu ka duh duh ka ti thei. Tunah pawh hian in khawvelah hian ka awm lo', a tia ka nuih a zat rualin mak chu ka ti viau thin. A boral ni kha han sawi ta ila- TV a en a, kei chokaah ka awm a, a eih vak vak a. Kei lah chuan, 'Tunge ko che, hei ka awm ve reng a, an koh che ka hre lo, i bengchhe ri anih kha", ka tih sak mai a. Mary chuan, 'May in min ko alawm. Ani chu thlarau khawvel ami ania, ka awmna nen chuan a dang. Min lo ko chiang lutuk', a tia. Chhan vak ngaihna ka hre lo ani ber, ka awih loh chu thuhran ni se (note to readers: hetia May hming a sawi hian ka phu chiang kher mai, mak ka tih bakah, ka thiante pawh chuan min lo melh hrek hrek a).

                    "Tichuan inchungah a tlan chhova, ka en zui lem hlei lo, kha kha ka thiltihsual ber chu ani ta ani (a hnuk a ulh hle a sawi lai hian). Ka hriat leh chu kawng thlang lama te thawm ani a, ka han dak thla chu ka fanu ruang thisen nen a lo inchiahpiah chu ka hmu ta. Min thawng kher mai". A bak hi chu in hrethiam ang a, ruang an sawngbawl a, an vui a kan hretlang vek ang chu min lo hrethiam ula. A tukah chuan kan han inhmukhawm leh a, May te ina kal chu kan rawt ta a (kei phei chuan ka hreh hle mai). Kan han sawi khawm nak nak chuan eng khawvel nge Mary khan a sawi ang aw? tih hi zawhna lian ber chu ani ta. Ka thianpa chu a ngawi vung vung a, "Mipakhat hriat ka nei a, hetiang lam hria hi ania, iva pan hmasa teh ang u May te in kan kal hmain", a rawn ti deuh phawng mai a.

mizo gothic story - 9th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

                    Khatia min han tham thut khan engkim chu vawilehkhatah a rawn reh duk mai a. Mary pawh chu a lo bo daih a, kan hlau lutuk chuan kan tlanchhuak a. Car lam panin kan tlan a, ka thianpa inah chuan kan pathum chuan kan khur zawih zawih hi ani ber. Esther chu kan han zawt a Mary chanchin chu, mahse ani chuan hetilai hmuna inhria annih thu chauh a sawi thei a. An inhriat hma lama Mary chanchi chu engmah hriat a lo nei lova, in an luah dunna a rei tawh ngaihtuahin mak ka ti angreng hle. Ka han zawt let a, Esther lah chuan, "Ka zawh pawhin engmah a sawi tha duh ngai lova, ka zawh loh khan kan hlim zawkin ka hria a, zawh enah pawh ka en ta lova", a ti a. Chuti si mak ka la tih fan chu, engtin nge a hriatchian loh in a luahpui ngam kha. Mahse a lehlamah chuan a awm ve thei tho, a chhan chu Mizo te kan tlem bakah khatia inluahpui tur mahni hnampui ngei awm kha chu a thlamuanthlak letling thei ang ka ring.

                    Esther pawh chu ka hlau ru ta riau mai a. Amah pawh ka hrilh nghe nghe a, ani chuan mihring pangngai anih thu chu a sawi chamchi bawk nen, rilru a pik duh hle. Esther chuan thil pakhat a rawn sawn chhuak a, ka thianpa nen chuan kan beng a verh hle- Mary kha darthlalangah a in en ngai lo tih hi ani. Enge a chhan a hre bik si lo, kei lah engatinge May kha a hran tih ka lo sawi ve chhen bawk. A mak duh hle mai heng thil zozai te hi, hlauh nen, rilru buai nen."Mary hi a chhungte number tal i nei lo em ni? Chhiat that atan pawh i kawl lo em ni?", tiin Esther chu ka han zawt a. Ani chuan a kawl thu leh Mary hian engtik hunah mah be pawp lo tur a a intiam tir vangin, a chhungte number lam hi a lo ngaihtuah vak lo a lo ni. Tichuan mary te in number chu kan han be pawp ta a. A tirah chuan a ring tlang thak thak a, mahse hetiang thil tehhrep kan tawng nen zah pawh kan sawi thei lo ani ber mai.

                    A hnu fe a chuan nu upa lam tih hriat deuh mai hian a lo la a. Mary biak kan duh thu ringawt a han hrilh a Esther chuan (hetihlai hian loudspeaker-ah phone chu kan dah avangin kan ngaithla vek, bakah Esther hi kan biaktirna chhan pawh hmeichhia te a lo ni a. Sawifiah leh lawk ila, Mary nu hnena hetia be duh anga kan insawi chhan pawh hi mary awm dan tehhrep vang kha ani), a nu lo chhan dan kha a tihbaiawm hle ani. Mary nu chuan, "Mary nen engtin nge in inhriat a? Pawl sawm anih khan kan inchung atang hian a zuangthla a, biak tur a awm tawh lo", tiin hnuk ulh tih hriat tak hian a rawn chhang a. Han biak zui zel duh mah ila, tun atan chuan a tawk khawp rih mai. Chti anih chuan Esther chuan thla a lo awmpui reng thin a lo ni maw? Ani pawh hian a hlau hle ani. Zawhna awm thei pakhat chu- May leh Mary hian enge inlaichinna an neih? tih hi ani.

mizo gothic story - 8th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

                    Photo frame chu ka rap lutuk chuan ka paih nghal thuai mai a. Chutah tak chuan thil mak tak mai a thleng a- boruak chu a rawn vawt thut mai a, a vawh dan kha kan khawng tep thei ang tih vel ani. Hetia a rawn vawh thut hian thli a thaw lo hrim hrim. Mary chu nikhawhrelovin a tlu ta thut mai a, kan han buaipui nak nak a, second reilote chhungin a rawn harh leh mai bawk a. A hmel chu a rawn dang vek mai a, kan han muttir hnu chuan heti hian a rawn sawi a, "He inchhung tibuai tu hi ka hre tawh, May ngei kha ani e. Tunah khan ka hmu", a ti ta mai a. A hmuh dan chu engtin nge kan zawt chiang hman lo kher mai, boruak chu a rawn lum thut a. Chutah tukverh darthlalangah (kan hawina zawn tak) chuan hmel hi a rawn lang vuai vuai a, a rapthlak duh kher mai.

                    Chumi hnu lawk chuan boruak awm dan vel pawh a rawn pangngai chho ve leh ta a. Ka room atang chuan meikhu hi a lo chhuak a, kan va en chuan, ka thil hlui dahthatna (May thlalak ka dahna) box chu a lo kang hi a lo nia. Tuiin ka han leih a, a kang pawh chu a reh thuai a. A chhung ami a kang bang a awm takin tiin ka han hai nawk nawk a (ka ui ber chu May thlalak ho ani), mahse thlalak ho chu kan han en a, May chu a engahmah chuan a lang reng reng lova. Kan in en thap mai, a hrilhhai thlakin a hlauhawm duh khawp mai. Ka pian a hnu lamah hetiang hi ka vawikhat tawnna ani, midang tana tawn ve ah pawh ka duh lo.Ka rilru ah chuan a hmaa thlalak frame keh ta kha ka hre chhuak zawk a.

                    Ka va la a, kan han en nak chuan May chu a sir zawng hian a lo awm leh tawh a, khata a nui hmel kha ka rap kher mai. Ka thiante chuan an rawn en ve a, khami chhung lai te khan May chu a hrawk ah hian hrui hi a lo invalh hman a. Esther hlau lutuk chuan May chu auvin, "Engatinge he in hi i tih buai, engatinge mintih buai" tiin a auva. Chuta rapthlak ta em em chu, May (thlalak ami chu)chu a rawn nui chhuak anih chu. Ka va han phu chiang kher em khami tum kha chu. May kha ka ngaiin ka hmangaih em em e ti lo chuan tunah chuan a hlauhvin ka hlau ani ber tawh. Chutah le, kan awmna bul chiah bangah chuan thlarau niawm tak hi a vei tlang chhen mai a. Keimahniah te chuan a rawn kal tlang vel a, ka thlanfim hian min leih bawrh bawrh hi ani ber tawh.

                    Mahse vawilehkhatah a reh hian a rawn reh tlawk tlawk mai a. Kan thil tawn a rapthlak e tih tawh nak alaiin, Mary chu bangah a lawn kual ta vak vak mai a. A hmel rapthlak zia kha aw, a hma lawk a kan bula hlau ve em em khan min insiamchhiat khum ta hrep mai a. Esther pawh chu ka hlau lek lek tawh mai ani. Ka thianpa lah tihngaihna hre bik hek lo, kei lah chuti bawk. Kawngkhar lam pana kan han tlan chuan Mary chuan min rawn umzui zel mai si a. A mi melh dan rapthlak zia kha, a hmel insiamchhia ai chuan khatia min melh reng kha ka mittui a tla zawih zawih thei hial. Min rawn tham thut a... to be contd.

mizo gothic story - 7th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

                    Kan han en leh a chu hmel chu, a lo lang leh tawh lo nain tirilah min la fan reng mai. Kan nula te chu keini a mipa ai chuan an huai zawk emawni tih mai tur hi an nia, a ruk chuan ka zak ve deuh. Esther chuan ka ina tlaivar chu a rawt a, a chhan chu engemaw a thlen leh a rin vang niin ka hria (ka thianpa inah riah ka lo tum rilru deuh kha ania). Engmah chu a thleng lem rih lova, kan han ti ti pah ta a. Kan tlaivar zak mai a, engmah phei chu a thleng zui lova. Inrinni te a lo ni bawk nen ka in chu ka han ti fai vela, ka thianpa pawh chu a in lamah a phei rih a. Nula te pawh chuan zan lama rawn phei an intiam nghe nghe a, pawi ka ti lem lo hle mahni a awm ai chuan. Ka thlalak hlui te ka han phawrh a, May thlalak nalh deuh mai hi ka hmuchhuak a. Hei hi keima lak sak kha ania, la fuh ka inti hle thin. Dawrah thlalak frame ka han lei a, bangah ka tar ta vang mai a. Ka rilru chu a thar hle mai a, nunhlui ngaiin ka thinlung kha a rum ngawih ngawihin ka hre ber.

                    Tlaiah chuan ka thianpa chu a rawn phei a, a hnu deuhah Mary te thiandun pawh chu an rawn thleng phei zui ve mai bawk a. Kan han ti ti a, Mary chuan May thlalak ka tarchhuah chu a lo hmu a. A han en vang vang a, khawiah emawni a hmuh tawh thu min hrilh a. "Hetah a awm ve thin alawm, chuvang chu aniang", ti a ka han chhan chuan Mary chuan ala en zui reng thova. A ngaihtuahna chu a kal ding hle tih hi a hriat theih. Zanriah atan ka vawksa rep neihsa chu kan han hmeh a, ka eitui hlawm hle kha ania. Kan han sawi khawm leh nak nak a, a hmaa thil thleng chungchang. Chumi karah chuan Mary chuan May chanchin min lo zawt pah ve reng bawk a. May chanchin hi sawichhuah nuam ani lo nain, chutia min han zawh chuan ka sawi ta a (refer chapter 1). Pawi an tih zia te chu min han fah lawm lawm hlawm a, a nawm phah chuang lo kher mai.

                    Mary chu guest room ava lut chu keini lo ti ti chu min rawn au a. Kan va phei chuan nachina banga ka tar thlalak ngei mai kha khum chungah chuan a lo let ngat mai a. Mary hian ama lak phae ani thei lo hrim hrim a, a chhan chu khawih ni se kan hmuhpui vek ngei ang. Mak kan ti hlawm hle mai a, han sawi tur kan nei lo hlawm hle. Esther chu a rawn te chhuak ti tih deuh a, a mittui a parawl nghal bawk a. Kan han zawh chuan, a sawi chi loh ati mai a. A hnua kan zawh tak sek avang chuan hetihian a sawi ta a, "Lo haw lo la, May thlalak kan en lai khan in lo hmu ve emaw ka tia. Min rawn melh a, a nui bawk a, ka hmuhsual ani lo ka ti ngam. I bialnu hlui ani sia ka sawi lawk duh lo anih kha", tiin a sawi a. A ruk chuan ka thinrim tep naa, ka ti lang lo.

                    May hi lo hrang ni ta se, enge a chhan ni ang? tih hi zawhna lian tham tak chu ani. Mahse ani thei lo... a hrang thei lo... ani ang nunnem kha a hrang lovang... midang aniang hrang hi... bakah ka awih thei dawn chuang lo. May thlalak pawh chu ka han tar tha leh a, a hmel danglam lai chu (hlau chung chungin) hmuh tumin kan melh thap mai a. Mahse a hnua thil thleng kha kan lo en loh tlan lai tak ani. Kha frame darthlalang kha a rawn keh chuai mai a, kan phu chiang hle mai. Thlalak chu ka han la thla a, mahse kan thil hmuh chu mak kan ti tlang hle mai, min rap bawk. May chuan hnunglam alo hawi daih anih chu.... to be contd.

mizo gothic story- 6th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

                                Chutia min rawn pan chu nikhaw hre lovin ka lo awm ani chek ang chu, ka han harh chuan chhuatah ka lo mu reng mai a. Ka tihngaihna hre lo chuan pawnah ka tlan chhuak tawp a. Engmah phei chu a thleng zui ta lem lo a, pawnah chuan ni chhuak ka nghak thleng rak mai. A tlangvala pumpa chutia han awm chu ka zak hnuhnawh viau na a, mak chu ka ti lo thei lo. Ka thianpa chu ka han hrilh a, ani pawh chuan ka thusawi chu a awih ve ta deuh aniang rawn riah chu a tum ta a. Chumi chawlhkar tawp ah chuan ka han inthiar kha, chhuatah (tile ang chi kha ania) hmel hi a lo lang a. In hriatthiam dan tur chuan he ka toilet hi European type ani a, hma lam bih thlak chiah ang vel ani a hlat zawng chu. Ka inthiar pawh chhunzawm ta lo chuan ka tho sawk sawk a (ka la inthiar hman lo) ka thianpa chu ka han ko ta a.Kan let leh chuan a hma ai khan alo dang lam tawh nasa khawp mai. A rapthlak duh kher asin. 

                                   Chu hmel awm dan chu ka la mitthla thei tun thleng hian. Ka hmuh tirh kha chuan hmel ani tih a hria theih kha ani a, kan va let leh chuan hmel chu a lang chiang kher mai (a lan dan ber ni a ka hriat chu _ hmeichhia thi tawh, a hmel pawh tawih chhe tan tawh a ang deuh ber). Ka thianpa chuan tihfai a han tum a, a nawh nasat poh leh a lang fiah tulh tulh mai lehnghal a, a rap awm zia kha. Chutah kan thin ti thawng em em tu a thleng ta- chu hmel chuan a mit tihbaiawm deuh chu a rawn khap vel. Kan te chhuak lo chauh hi ani ringawt, mahse chhuat a hmel lang vanga patling pahnih han tlanchhiat em kha chu kan tlawmngai deuh chuan ka hria. A reh mai loh avang chuan hmun hranah (inthiarna hi pathum a awm ka inluah ah hian) kan inthiar mai a, a chhan pawh hmel bula inthiar chu nuam a nuam lem lo. Pahnih kan nih vang chuan hlauh dan a nep lo kher mai. A tuk ah chuan kan han en leh a, a lo lang ta reng2 lo mai a, a mak duh kher mai. Zanriah kan ei kham, ka thianpa guest room lama a inthiar chu a rawn te chhuak vak mai a. Ka va thlen phei chuan ka thianpa chuan inthiarna chhuat chu a lo kawk ringawt a. Ka han en nak chuan hmel bawk a lo ni leh a, a hma ai chuan a fiah in a mitkhap pawh chu a rang zawk a. Ka hlau lutuk chu ka mittui hi a tla zung zung tawh mai a. Kan che vel chu min melh anih chu, a rapthlak zia kha aw. 

                                A mit khan min melh kual rek rek a, kan mitah kher min melh kha chu ka zam ngang mai. Tichuan, ka thianpa chuan Esther leh Mary te chu ava phone nghal a, anni chu zan rei tawh mah nise an rawn thleng phei ta thuai a (Mary te hian car an nei). Esther chuan a hmuh rualin, "Hman ami phei kha chu lei te min chhuah khum thin, amahin a reh leh mai zel" atia. Kan han ti ti zel hnu chuan kha hmel kha hmeichhe hmel nge niin kan hria a, tunge anih chu zawn chhuah kan rilruk ta a.

mizo gothic story- 5th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

                                May nena kan inbiak hnuhnun bera a thil sawi kha, "Ka hmangaih che" tih hi a ni. Esther te ina kan len atang khan kar engemawzah a lo ral leh ta reng mai. Company hranah te hna tha zawk hmuh vangin ka rilru pawhin thildang a ngaihtuah hman lo ani ber. Esther te inah hian ka leng phei zeuh zeuhva, kawm an nuam hle mai. Tlaikhat ka office bang chu (ka hna thar hi day shift ani tawh a zing dar 8 atanga tlai dar 5 vel thleng ani) ka chau deuh nge ni, ka lo muhil a. Dar 9 velah ka harh hlawl chu ka sil thum mai a. Dik lo awm tlat hian ka hria a, a chhan pawh boruak chu a rit hle mai a hriatna ka neih vang pakhat niin ka hria. Ka han thu chhuak a, tukverh te pawh chu ka han hawng nain boruak chu a zang thei lo (han sawifiah mai pawh a harsa). A reh hian a reh tlawk tlawk mai a, mihring leh leh thildang thawm pawh hriat tur zuk awm miah lova. Chuti tak mai a a han reh chu a ngaihthatthlak duh loh hle . Mahse engmah a ni lovang tiin rawngbawlsan ka han tum chu, ka beng bulah tak mai hian thaw ri chiang em em mai hian ka hria a. Ka hlau kher mai a, ka tirilah min fan nasat zia kha. Thaw ri pangai nen a danglamna em em chu, asthma nei thaw ri ang hian a ri chu a awm. Ka beng bul chiahah a ni nain thaw lum huam ang hian a awm si lo kha mak ka ti bawk. Ka han hawi kual a, engmah phei chu ka hmu lo. Ka thianpa inah riah chhuah mai kha ka duh rum rum hial, a hma ang ngawt chuan ka huai ta lo chiang kher mai. Mahse inti pachang lui chungin rawng chu ka han bawl ta a, ka rilru chu a nuam chuang lo hle. 

                                A rapthlak ka tih rualin mak ka ti bawk si. Ka thianpa chu ka han phone a (ani hi chu zan lamah hna a thawh avangin va phone vel hi a inthlahrunawm thin hle) thil awmdan chu ka han hrilh a. Ani lah chuan min lo nuihsak vel mai mai lehnghal a, ka thinrim hle kha ania, mahse a awm ve tho chuan ka hria, hre ve lo tan chuan. Chaw te ka han eikham hnu chuan mut zai rel ka tum ta a. Mahse a hmaa thil thleng vang nge ka lo mut sek tawh vang chuan ka meng kur mai a. Tluzal chung chuan ka ngaihtuah zui mai mai a, a nuam duh lo hle mai. Ka lo muhil sek nge engemaw hian minti harh zawk mai a ka phu chiang kher asin. Thlan tuiin min bual nghal vek a, a chhan pawh ka hma chiahah hian mihring zia (figure) hi ka hmu tlat mai. Ka rap zia kha sawi ngaihna pawh ka hre lo. Mipa e ti lo chuan ka mittui a tla hial thei anih chu, a MAN loh theih khawp mai. A var deuh pup hian a lang a, a shape chu a inthlak reng mai a, a chang leh chhum zing ang deuh te hian a awm a. Min rawn pan hnai ta deuh deuh nen ka hlau kher mai. Ka awmna atangin feet 10 velah a awm tawh tih pawh chuan hmel leh taksa a nei lo tih a hriat theih a. A taksa (ti mai ang) chu a lang tlang theih dan chu a "feel" theih hial in ka hria. Meng chung chuan ka tawngtai zui mawlh mawlh mai a.

mizo gothic story- 4th chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

Chutia ka han zawh zawm zel takah chuan Esther chuan heti hian a sawi ta a: "Hniak kha a len loh avangin hmeichhe kehniak ni turah kan ngai ringawt a. Kan in neitute lah khan mak anti khawp mai lehnghal a, an hlau ve chuan ka hria. Chhuahsan vang vang kha kan duh a mahse inluah tur dang te a awm mai lo nen hrehawm ve duh tak chu ani. Chutah zan khat chu kan mu lai hi ke pen thawm ring tak hi kan hre thut a (Esther leh Mary te hi khum khata mu thin an ni), min tih harh chiang lutuk. Kan hlau bawk si, light kan han ti eng a engmah kan hmu si loa. Chutia kan han mu leh tur kha min bawhtu awm niawm tak hian che thei loin kan awm a. Kan tawngchhuak thei bawk si loa, hlauh nen a hrehawm duh khawp mai. A tirah chuan maimizial emaw kan ti a, mahse thawm kan hria nen kan hmehbel lo thei si loa.

Mary phei chu engmah alo sawi si loa, a tukah chuan a malpui zawng zawng hi alo duk vek mai a. Na phei chu ati em em hran lo a mahse kan hlau hle mai a. Mizo tumah dang kan hre bawk si loa, a manganthlak duh asin aw. Tichuan PG te kan han zawng a, a lo ruak hlawm bawk si lo nen hna thawk kan ni bawk si. Haw mai te kha kan duh a. Sawi ta zung zung ila he thil thlen hnu thla hnih chu he thil hian minti buai hle a. A chang phei chuan choak thi uih tawh te hi room ah alo awm ringawt a. A chang leh chokaa thil vel a tla rum rum reng bawk nen, inluah tur kan hmu hlauh bawk, kan chhuahsan ta ani", tiin a sawi a.

Ka ngaihtuah zui ta mai mai a- Engatinge an luahtirh khan engmah an hre siloa, a hnuah chauh khang thil te kha a thlen le? tiin. Mak chu ka ti ve viau mai, a chhan pawh dawt sawi hmel an pu loa, bakah ka thil hmuh te ka han belhbawm chho ta a. Ka thil hmuh kha ka hrilh ve mai mai kha Esther chuan, "Keini pawhin i inah kan awmlai khan kan hmu fo mai", ala ti zui. Mahse ka ngaihtuah let khan hmeichhe hmel ni tlat in ka hre pek a.

mizo gothic story- 3rd chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

"Ka hmu sual aniang ka taksa a chak vaklo nen", tiin ka inhnem ta hram a. Nuam chu ka ti chiah chuang lo. Ka hmuh tum loh lutuk hmu kha ka ni bawk a, ka mitthlaah hian ala cham reng. Inentir ta lem lo chuan Pathian zarah ka dam ve leh ta mai bawk a. Hna te ka han zawm a, a ngai te te in ka han nung chho leh a. Mahse a hmaa ka thianpa min hrilh kha ka hre chhuak leh thin a, zawhfiah tur dang ka hre si lo nen. Tichuan ka thianpa chu ka han zawt nawn leh ta a. Ani chuan a hma ang thoa minlo chhang chu ka dang duh bik loa. A hmaa nula pahnih luahtute kha zawn chhuah ka duh tlat mai si. Ka thianpa (a hming hi thup tura min tih avangin ka sawi loa min lo hrethiam dawn nia) chuan a hmaa lo awm tawh te zawt kual in, a tawpah nula te chu an identity leh address kan hre thei ta hlauh mai a.

Kan han be pawp a, kan veng chu alo in hlat lo hle mai lehnghal a. Ka zawh duh ber kha chu- engtin nge tuna ka luah laia an awm thin laiin a hran thin? tih hi ani. Tichuan awm leh mawi lam pawh ngaihtuah lo chuan chumi chungchanga biak ka duh thu ka hrilh tlang nghal a. An lo fel phian a mai lehnghal a. Sawi tur a tam e antih avang chuan chumi weekend lo awm turah chuan ka thianpa nen zanriah ei turin min lo sawm nghe nghe a. Nghakhlel tak chuan chumi chawlhkar chu ka han hmang zo a, nula te inah chuan kan va kal ta a. Mizo kan tlem avangin min lo lawm thiam hle a, a nuam in kan tlangnel nghal hle.

Tichuan zanriah te kan han ei kham a, topic ah chuan ka lut nghal chat mai a. Ka han zawt chiang ta a engvanga an inluah lai chhuahsan nge an nih chu. Nula te hi Mary leh Esther an ni a, Mary tak hi chu a tawng tlem hle thung. Esther chuan tihian min hrilh ta a, "Kan luah tirh kha chuan engtinmah pawh a hran em em kan hreb lo. Kumhnih vel kan awm khan a rawn hrang tan ta a. Kan thil hi a bo zeuh zeuh mai a, han rinhlelh tur an awm si loa. Tihngaihna kan hre lo chuan kan landlord kan hrilh a. Ani lah chuan eng teh ualah min lo ngaih sak lo nen a hrilhhai thlak duh asin aw. Mahse kan chhuahsan ringawt thei si loa, inluah tur te a vang si a. Mahse thil bo kha chu nep te hi alo nia.

"Mit a kan hmuh hmasak ber chu hniak ani. I choka leh pindan zau (hall) inkalpawhnaah sawn kan office bangin hniak kan hmu teuh mai a. A rawng pawh a dum tluk nghe nghe ani, tihfai pawh har tak ani. A tirah chuan misual hniak turah kan ngai a, mahse engkim a inkalh that vek avang chuan kan hlau ta deuh a. A tukah pawh chuan hniak chu a hma aia thuiin alo awm leh ringawt a. Tun tum phei chu tuna i pindan zau bang thlang lamah sawn ani. Bangah a vei kual niawm tak hian kehniak chu kan hmu ania. A rapthlak duh kher mai. A tuk leh ah phei chuan pindan zau leh bang dep room indanna bangah a kal tlang tlat mai a. Nula mai kan ni si a kan hlau hle ani. Han pun tur mai kan hre si loa", tiin Esther chuan thakhur ti tih hian a sawi a. Mahse sawi ta sa sa ka han zawt zawm leh a hniak awm dan vel chu... to be contd

mizo gothic story- 2nd chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

A tuk chu khua a thiang ang reng hle maia ka rinphak bakin.Mahse kan flight chu an delay nasa hle tho mai. Tlai dar 4 dawnah ka thlawk chhuak chauh lehnghal a, ka ning hman hle mai. Connecting flight ka miss tep lehnghal a, ka in sang phek hman hle bawk. Zan dar 10.30 velah ka thleng ta hram a. Tichuan ka thianpa inah ka han awm ve nawk nawk a thlakhat vel chhung chu. Hna te ka thawk ve ta bawk a, mahni ngeia in luah tha ka ti bawk nen, in luah tur zawngin ka vei hnem hle mai.

Chutia in zawng meuha chawlh ka la chung pawh chuan a vang hle. Tlaikhat chu vanneih a siamin ka hmu ta hlauh a, a nuam phian a room awm dan pawh. Ka room bakah room dang pakhat a awm bawk a, guest room atana ka tih deuh ani. Mahse ka rin ai daihin a luah man alo tlawm a, mak ka ti deuhin ka thiante chulai hnaia awm thin ka zawt a. Heti hian min chhang a- "Ka hrechiang chiah bik lo nain, sawi thawm hi chu a awm a. A hrang an tih vel chu ka hre fo a, a tak anih leh nih loh ka hre lo. Hmana Mizo nula 2 in an luah kha chuan a hrang antia an chhuahsan phah kha ania" a ti a. Mak chu ka ti ve tho a, mahse ka inla mipa vea bakah ka dawihzep loh vangin engteh ualah ka ngaihsak lem hlei loa.

Hna zan lamah ka thawh avangin ka haw tlai thei hle mai a. Zing dar 2 velah in hi ka thleng tlangpui ani. A tirah kha chuan in adjust pawh a har ka ti viau a, mahse ka han thawk rei ve ta deuh a, alo in adjust ve theih mai. Thian ka kawm em em loh avang leh mahni a awm nuam ti chi ka lo ni lehzel nen ka chhuak khat thin hle. Weekend ah pawh inah ka tawm chawt hi ani ber. Kum dawn alo vei ve ta a, ka thianpa sawi anga hrang kha ka la hre ve tlat pek lo. Ka ngaihtuah ve fo na in, a aia thil pawimawh in rilru ala fo reng ani.

May nen khan kan inhmangaih em em a, a boral hnu phei kha chuan hmeichhe dang hian ka rilru an luah thei lo hi ani ber mai. Khatia a inawkhlum tih ka hriat khan ka khawvel hi tih boralin a awm ve nghal ni berin ka hria. Mahse muangchangin ka in recover chho zela hun leh ni te alo liam tak zelah chuan. Ka theihghilh e ka tihna niloin, hna te pawh ka thawk thei lo alawm a hma khan. Vawikhat chu ka dam lo na angreng khawp maia, ka tlun vak maia. Ka thianpa in zanhnih min riahpuia. Hnathawk ve tho anih avangin a hman reng bik loa, ka inthlahrung nen pawi pawh ka ti vak hran lo. Chutia tlaikhat khumbeta ka mu, tukverh ka dah chhuah chuan mi kal phe vuai hi ka hmu a. Ka va en a engmah/tumah ka hmu si loa ka let leh a ka mu leh a. Chutia ka mu leh chu ka han saisir deuha bang chhak lam ka'n melh chuan mihring hmel ang deuh ruai lang hian ka hmu tlat pek a, mi rap hle mai. Mahse ka inti mipa a, ka mit vaiah ka ngai ta tho nain tiril chu a fan hle. Ka en chian leh chuan alo lang tawhn loa

mizo gothic story- the first chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

Kum 2010 kan lo chuang kai ta reng mai a. A hma zan lamah party naah ka lo in hnem deuh nge, a tuk ka tho chu ka lu ana hle nain damdawi ka ei hran lo. Tlai lamah chuan in tih harh pahin park velah ka tei mai mai a. Fur lai alo ni leh zel nen khua chu a dur deuh khup a, lung a ti zing hle. Ka hun kal tawh te ka ngaihtuah a- ka hmangaih em em, a ruang pawh hmu hman loa ka chan kha ka ngaihtuah chhuak a. Ka rilru ana thar hle ani. A inawkhlum tih chiah kha ka hriat ani a. Ram danga ka awm lai ani si a, a ruang pawh ka hmu hman ta lo kha ania. Mahse thildangin ka rilru a rawn luah ta thuaia. A tuk lawka zin tur ka ni a (he ka zinna tur hmun hi a hmaa ka sawi ka hmangaih em em ka chan takna khua ngei kha ani), han in pack vel te ka ngaih avangin ka haw ta thuaia. Zan lamah chuan ruah a sur deuh reng avang chuan a tuk flight an cancel ang tih ka hlau hle. Tichuan ka in pack zoa, zanriah pawh ei ta lem lo chuan mut zai ka rel ta a.

the presence

As I walk past Your chamber
I can feel Your presence
Though I cannot see You
I dare not look into those eyes
Tears running down My face
Tears of blood ripens like wine
Black angel staring at My soul
Waiting for the deepest of feelings

As I walk past Your soul
I can feel Your cold presence
Though I cannot touch You
I dare not go away from You
Fearing the fearless ones
River of blood becomes bitter
Dark angel clutching Your soul
Waiting for the white hot room

desire

I was wondering how I ever thought it was right
Maybe the the flashing of Your face let me say it
Or maybe to justify My state of derangement
But was that the worst mistake of My life?
To make You understand with all My might
Till the sky sheds it's tears
Or the oceans beneath cry out Your name
You'll see why I struggle to live
To let You see who I am
When You touch My hands I know
With the soul that that is too cold to bear
How can I survive a crime like this?
To bring Your warmth back?