mizo gothic story - 23rd chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

Thil pakhat ka sawi duh chu- horror story nen ngaihpawlh lo hram turin ka ngen che u. Gothic story anih angin supernatural chu a tel ngei tur chu a ni alawm, mahse horror story anih loh ang bawkin khawngaihtakin a hrang vel ai chuan a gothic originality min en sak hram hram turin ka ngen che u.

                    Kan va thlen chuan in hlui deuh tawh hi a lo ding luah mai a, kan han luh chuan Biakin thin niawm tak chuan a lang. A chhung chu a bal hle mai a, maicham awmna hmun tur niawm tak pawh a awm. Khua a thim tan tawh avangin chumi hmunah chuan riah zai kan rel ta a, a hma zan kan mu lo nain kan chau hran lem lo. Hemi zan hian engmah a thlen lem loh avang chuan kan han ti ti a, chhuna thil theng chungchang te chu kan han sawi hova. Engmah thutawp siam ngawt thei kan ni lo bawk nen, a mak a ni tih bak chu sawitur a vang hle mai. Pi Biaki ber pawh chuan sawifiah ngaihna ala hriat bik loh thu bak a sawi lem lo.

                    Tichuan, ka lo muthlu a ni teh chek ang chu, engemawni hian min ti harh zawk mai a. Ka han hawi kual a engmah chu ka hmu lem lo, mahse kil khatah hian tu emawni awm tlat a hriatna ka nei a. Eng vang nge chu ka hre lo, ka hlau miah lo hemi tum hian. Mawmbati keng chuan ka va pan hnai ta a, ka thil hmuh chuan ka hnuk a ti ulh kher mai. Chuta ka va hmuh chu May a ni, amah ka hlauh thina te kha alo reh vek mai a. Tawng pawh kan tawng thei lo, kan tap dun ringawt mai a ni. Ka hmangaih ber, ka chhuan em em thin ngei kha mihring pawh a ni tawh lo maw?

                     Ka va han hmangaih tak em henu kher hi chu!!!! Min kuah chung chuan a tap hawm hawm mai a, a awm dan chu ava han na dawn tak em! A ni aia hmaifang tha, nunnem bawk si kha an awm ngai lovang. A na tawrh, thlarau pawh nei lova a hrehawm tawrh chu a them chauh ka hriatthiampui ve ni berin ka inhria, chu chauh pawh chu a va na em. Hetiang teh hrep hian maw a lo tawrh a? Ka lainat kher mai, tawng pawh kan tawng thei lo. Zawh duh chu ka ngah mai, mahse tun ang hun hi kan tawng leh tawh kher lo mai thei asin. Tun hun zel hi a lo hlu a ni tih te min hriatchhuah tir a. 

                    Kan thawmah chuan midang ho chu an rawn harh a. Mawmbati pawh a dang an chhi belh nghal bawk, mahse May, ka hmangaih em em hi ka pawm tlat rih... ka thlah phal lo. Esther pawh chu kan hrehawm tawrh min hriatpui niawm tak chuan a mitui a lo luang ve zung zung a. Chutah kan han in hru fai a, thuthmunte kan han rem fel a. May chu zawh tur kan neih thu te Pi Biaki chuan a han hrilh phawt a, a ni pawh chuan sawi tur a ngah thu te chu a sawi ve bawk a. Mahse May chu kan han sawi hmasak tir ta a.... to be contd.