mizo gothic story - 22nd chapter

(Note: The story is purely fiction and does not, in any way, relate to the life of anyone. He thawnthu hi ka phuah liau liau ani a, mahse thawnthu dang in lo chhiar tawh nen inanna alo awm anih chuan min notify hram turin ka ngen che u. I hate plagiarism just as much as I don't want to be part of it)

                    Chutia engmah hmu ta lo, let kan han tum a kan hawi let chu leiah hian naute a lo mu reng mai a. Esther chuan rang takin a han pawm kang ngawt a (naute hi a lo intuam a, thla thum vela upa niawm tak a ni), a mit chu a chhing nain a mitsir lehlam ve ve atang chuan thisen hi a luang chhuak a. A rawn meng thut chuan min ti phu chiang kher mai, Esther pawh chuan a thlauh phah nghe nghe a. Chu naute chuan mitmu reng reng a nei miah lova, chutah a rawn ding chhuak a (thla thum vel niawm a ni ka tih tawh kha, a puan phelhna a tlak chiah chuan a rapawm duh kher mai. A dul a kaw hur mai a; pumpui, thin, ril etc., reng reng a nei lo. A nui hmel mawlh kha ka theihnghilh ngai lovang.

                    Chutah aw rapthlak lutuk (kha aw kha ka tehkhin dan ber chu- patling, nutling leh naupang hi a rualin tawng se, an thil sawi tur in ang chiah chiah bawk se chutiang chu a ni) mai hian, "Min ei ve chak em?" tih leh a a mitmu awmna kawrawng tawh chu kawm a rual a. A kut zungtang a tawi tehreng nen chuan a thluak chu a rawn kawm chhuak teuh mai a. Amah chuan a ei bawrh bawrh anih chu!!! A rapthlak duh kher mai, chhun pawh ni se, ka hlauh dan a nep lo kher asin aw. Kan han tlanchhiatsan dawn chuan kan kalna turah min dang tlat bawk si, kan kalna a zim si, ui ang te chuan a la rawn bauh vak vak zui a. Ka thianpa chuan lunglian angreng tak chuan a han vawm a, a tlu ve chawrh mai a.

                    Chu chu remchangah la in kan han tlansan a. Engin nge min mawlh pawh ka hre lo, tlanpah chuan ka hawi let hram a ka thil hmuh chu a rapawmin a mak duh hle. Chu naute rapthlak tak chuan a thluak bua chu a lo chhar khawmin a lo la ei anih chu!!! Kan han tlan zel a mahse naute chuan,"Min tlanchhiatsan thei lovang. Ka ei vek dawn che u, in vai khan" tiin a rawn au let zui vel a, chutah kan hma takah chuan a hma ang bawk chuan naute a lo mu leh reng anih chu. Kan hlau tawh si, kawng dang zawhin kan han tlan a, chu thil tihbaiawm tak chuan min rawn umphak rang hle. A mitmu awm thina khuar chu a han kawm leh a, a thluak chuan ka hmaiah tak hian min rawn vawm a, a then phei chu ka ka chhungah a lut hial. Ka hlau si, ka ten bawk si... ka te teng tung mai a.

                    A letzawnga han tlansan kan tum lai tak chuan chu naute chu rang mangkheng hian a tawih ral rup mai a (mahse ka hmaia thluak la kai kha chu a awm tho). A hma zana kan awmna in kha pan leh kan han rawt nain kha'ng thil thleng teh hrep avang khan kan thulh leh ta a. Mahse zanlam atan thil mamawh zawn pahin tiin in hrang hrang chu tlawh kual kan rawt ta zawk a. Kan mamawh te chu kan han lamkhawm a, hetih chhung hi chuan buaina kan tawk hran leh miah lo. Kan han fang kual a chu khua chu, a reh kher mai (thil pakhat chu tumah chu kan riltam ngai miah lo amak ve hle mai, tuihal pawhin kan awm lo). Hmun hla deuhvah chuan Biakin niawm tak hi a lang vuh mai a, pan zai kan rel ta a... to be contd